Fyrirfram var búist við jöfnum baráttuleik á milli SR og SA þegar liðin áttust við í toppdeild karla í gærkvöldi þriðjudaginn 25. nóv. Akureyringar hafa byrjað þetta tímabil vel og varla slegið feilpúst. Oft verið með jafnan leik, en náð að landa sigri með mikilli seiglu. Leikurinn í gær í Laugardalnum var aðeins öðruvísi. Greinilegt var að norðanmenn söknuðu Jóa Leifs og Andra Mikaelssonar því það var svona eins og það vantaði smá brodd í sóknarleikinn hjá þeim. Að sama skapi nöguðu SR neglur fyrir leikinn af áhyggjum, því aðalmarkvörður þeirra Jóhann Björgvin var á sjúkralista og gat ekki leikið. Ævar Þór Björnsson stóð á milli stanganna í hans stað, gamalreyndur en ekki í mikilli leikæfingu sem stendur. Ævar gerði sér lítið fyrir og varði 26 af 29 skotum gestanna á markið sem er 89,7% markvarsla. Ég held að á engan sé hallað þó ég segi að hann var maður leiksins þegar upp var staðið. Hann átti frábæra spretti og lokaði á stórsóknir norðanmanna aftur og aftur. Þetta var hraður og skemmtilegur leikur sem okkur var boðið uppá í Laugardalnum í gærkvöld.
Bjarmi Kristjánsson SA og Gabríel Camillo SR
Leikurinn fór rólega af stað og það var ekki fyrr en á 16. mínútu að fyrsta markið kom, þegar Alex Máni Sveinsson skoraði eftir stoðsendingu frá Gunnlaugi Þorsteinssyni í yfirtölu, og þar við sat, í enda fyrsta leikhluta. Segja má að í öðrum leikhluta hafi SR tryggt sigur sinn í leiknum með því að skora 4 mörk gegn 1 marki SA. Haukur Steinsen skoraði eftir stoðsendingu Heiðars Kristveigarsonar. Hákon Marteinn Magnússon bætti við 3 marki SR eftir stoðsendingar frá Þorgils Eggerts, og Sölva Atla. Alex Máni Sveinsson bætti við öðru marki sínu og fjórða marki SR eftir stoðsendingar frá Hákoni Martein og Sölva Atla. Fyrst þá á þrítugustu og sjöttu mínútu svöruðu SA menn fyrir sig þegar Matthías Stefánsson setti mark í yfirtölu stoðsendingarlaust. SRingurinn Daníel Otuoma bætti síðan við fimmta marki SR stoðsendingarlaust 30 sekúndum áður flautað var til loka annars leikhluta.
Það voru bara liðnar 2 mínútur af þriðja leikhluta þegar Gunnlaugur Þorsteinsson setti 6. mark SR og eftir það var aldrei spurning hvoru megin sigurinn félli. Varnarmaðurinn ungi hjá SA Ormur Jónsson var ekki tilbúin að játa sig sigraðan og skoraði hann tvö mörk fyrir SA í þriðja leikhluta. Það fyrra varð eftir stoðsendingar frá Hafþóri Sigrúnarsyni og Heiðari Jóhannssyni. Seinna mark Orms kom svo eftir stoðsendingu frá Bjarma Kristjánssyni þegar tæpar tvær mínútur voru eftir af leiknum.
Unnar Rúnarsson of Hákon Marteinn Magnússon eigast við í leiknum.
Nokkrar tölur úr leiknum
Leikurinn sjálfur:
Mörk: (1-0, 4-1, 1-2) 6-3
Skot á mark: (7-12, 17-7, 5-10) 29-29
SR:
Alex Máni Sveinsson 2/0, Gunnlaugur Þorsteinsson 1/1, Hákon Marteinn Magnússon 1/1, Haukur Steinsen 1/0, Daníel Otuoma 1/0, Þorgils Eggertsson 0/2, Sölvi Atlason 0/2, Heiðar Kristveigarson 0/1, Ævar Þór Björnsson varði 26 af 29 skotum gestanna á markið sem er 89,7% markvarsla. Refsimínútur SR 8 eða 4 * 2 mín.
SA:
Ormur Jónsson 2/0, Matthías Stefánsson 1/0, Hafþór Sigrúnarson 0/1, Heiðar Jóhannsson 0/1, Bjarmi Kristjánsson 0/1, Róbert Steingrímsson stóð fyrstu tvo leikhlutana í marki SA og fékk á sig 19 skot og varði 14 af þeim eða 73,6% markvarsla. Jakob Jóhannesson kom inn í mark SA í þriðja leikhluta, fékk á sig 10 skot og varði 9 sem er 90% markvarsla. Refsimínútur SA voru 14 eða 7 * 2 mín.
Myndir sem fylgja eru frá Hafsteini Snæ Þorsteinssyni