Núna þegar það fer að líða að jólum skulum við aðeins kíkja á stöðuna á okkar fólki erlendis.
Svíþjóð
Sunna Björgvinsdóttir og Katrín Björnsdóttir eru að spila fyrir Södertelje SK í næst efstu deild Svíþjóðar og hefur gengið verið afar gott. Fyrri hluti deildarinnar var að klárast og endaði SSK efst í deildinni með 10 sigra í 12 leikjum. Þær hefja svo leik í suður riðli Dam HockeyAllsvenskan næstkomandi föstudag þar sem efstu liðin fara í umspil um það að komast í efstu deild. Katrín spilaði alla 12 leiki liðsins í fyrri hlutanum og var þar með 1 mark og 2 stoðsendingar á meðan Sunna spilaði 11 leiki og gerði í þeim 6 mörk og gaf 4 stoðsendingar. Sunna hefur einnig spilað 2 leiki á láni í HV71 sem leikur einmitt í efstu deild en náði hún ekki í stig í þeim leikjum.
Sunna í leik fyrir SSK
Saga Blöndal spilar einnig í næst efstu deildinni í Svíþjóð fyrir IF Björklöven. Líkt og SSK gerðu þær afar vel í fyrri hlutanum og unnu 10 af 12 leikjum og komu sér örugglega í norður hluta Dam HockeyAllsvenskan. Saga sjálf hefur einnig gert mjög vel og í þessum 12 leikjum hefur hún gefið 10 stoðsendingar og gert 1 mark.
Saga Blöndal í myndatöku hjá Björklöven
Andrea Bachmann spilar fyrir Almtuna IS sem er í næst efstu kvenna deildinni og einnig fyrir U19 kvenna lið félagsins. Andrea hefur staðið sig vel í báðum liðum og í U19 er hún með 94,8% markvörslu í tveimur leikjum og í kvennaliðinu er hún með 90,8% í 6 leikjum. Kvenna liðið spilaði fyrri hlutan í sama riðli og SSK en höfnuðu þær í 4 sæti, einu sæti frá því að fara í umspil um sæti í efstu deild.
Díana Óskarsdóttir spilar einnig fyrir Almtuna IS líkt og Andrea. Diana sem er einungis 16 ára hefur verið á skýrslu hjá U19 kvenna liðsins en ekki komið við sögu þar ennþá. Ekki fannst tölfræði um yngri deildir en U19 en allar líkur á því að þessi ungi og efnilegi markmaður sé að spila fyrir yngri lið klúbbsins.
Ýmir Hafliðason spilar fyrir U18 lið Östersunds IK sem spilar í norður hluta U18 Region sem er efsta deildin þar í landi. Liðið spilaði 11 leiki í fyrsta hluta keppninnar þar sem efstu 6 liðin fóru í efri hlutan. Östersunds endaði í 7 sæti og fóru því í neðri hluta norður deildarinnar og eru þar efstir eftir 7 leiki. Samtals hefur Ýmir spilað 13 leiki en hann hefur ekki fengið neitt stig ennþá. Einnig hefur Ýmir spilað 2 leiki fyrir U20 lið félagsins sem er í næst efstu deild og fengið í þeim leikjum eina stoðsendingu.
Kanada
Friðrika Magnúsdóttir spilar í NAPrepHL í Kanada fyrir U19 prep lið ASCIS Stallions. Skv. myhockeyrankings þá eru þær í 21. Sæti yfir kvenna prep lið í Ontario af 27. Friðrika sjálf er með 15 stig, 8 mörk og 7 stoðsendingar í þeim 17 leikjum sem hún hefur spilað.
Tryggvi Snævarsson spilar fyrir U16 lið Oxford Sabres í Kanada, og spila meðal annars í NAPrepHL U16. Í þeirri deild hafa þeir spilað 5 leiki og eru jafnir í 4 sæti. Tryggvi hefur spilað í heildina 13 leiki fyrir liðið og skorað í þeim 1 mark.
Þýskaland
Helgi Ívarsson spilar í Baden-Württemberg hluta þýsku fjórðu deildinni fyrir Baden Rhinos Hugelsheim. Liðið situr í öðru sæti deildarinnar eftir 9 leiki. Helgi sjálfur hefur tekið þátt í flestum leikjum af markmönnum liðsins eða 8 af 9. Ekki er hægt að sjá prósentu í þessari deild en hann er með að meðaltali 2,94 mörk á sig í leik.
Helgi í leik í Þýskalandi í vetur
Danmörk
Ólafur Björgvinsson spilar fyrir Esbjerg 2 í næst efstu deild Danmerkur. Liðinu er að ganga vel og standa þeir á toppi deildarinnar með 43 stig eftir 17 leiki og 10 stigum á undan næsta liði. Ólafur sjálfur hefur einungis spilað 10 leiki vegna beinbrots í putta en hefur gert 3 mörk og 3 stoðsendingar í þeim leikjum. Planið er að hann verði búin að ná ná sér almennilega um jólinn sem er mikilvægt fyrir landsliðið þar sem hann verður mikilvægur leikmaður í U20 ára landsliðinu sem fer til Serbíu í janúar.
Bretland
Helgi Bjarnason er að spila fyrir Leeds Knights í Bretlandi. Helgi hefur bæði verið að spila fyrir varalið og U19 lið klúbbsins. Varaliðið er að spila í NIHL 1, og eru þeir í 8. Sæti eftir 12 leiki í norður hluta deildarinnar. Þar hefur Helgi fengið 5 stig, 2 mörk og 3 stoðsendingar. Helgi er einnig að spila með u19 liði félagsins en þar hefur hann fengið 6 stig í 6 leikjum og liðið situr í 8 sæti.
Henrik Hafsteinsson spilar fyrir Nottingham Lions í Bretlandi. Að mestu spilar hann fyrir U16 lið klúbbsins og þar hefur hann staðið sig afar vel og fengið 7 stig, 3 mörk og 4 stoðsendingar í 5 leikjum. Liðið situr í 4 sæti norður hlutans með einn leik til góða þar sem sigur gæti komið þeim upp í annað sætið. Henrik hefur einnig verið að spila fyrir U19 lið félagsins, bæði aðal liðið sem og vara liðið og samtals hefur hann spilað 5 leiki og gert 1 stoðsendingu.
Pólland
Viktor Mojzyszek er að spila í Pólsku U20 deildinni fyrir MOSM Tychy. Liðið situr í efsta sæti deildarinnar með 42 stig eftir 14 leiki. Viktor sjálfur hefur einungis spilað 8 leiki en gert í þeim 3 mörk og 2 stoðsendingar.
Viktor í leik fyrir nýja liðið sitt MOSM Tychy
Holland
Gunnar Arason er að spila fyrir GIJS Marne Groningen í Hollandi. Liðið er eins og staðan er núna í 7 sæti deildarinnar eftir 10 leiki. Gunnar er með 9 stig, 3 mörk og 6 stoðsendingar sem af er tímabili í þessum 10 leikjum.