Petr Cech fyrrum markvörður Chelsea og Arsenal í ensku úrvalsdeildinni í fótbolta er snúin aftur. Fótboltaskórnir komnir upp á hillu og nú reymar hann skautana á ný.
Íshokkíliðið Belfast Giants hefur fengið sérstakt leyfi til að kalla á Petr Cech inn í hópinn. Vanalega er hann leikmaður neðri deildarliðs Oxford City Stars en leikur núna á lánssamning hjá Giants. Liðið spilar í Elite Ice Hockey League í Bretlandi.
Cech mun verja mark Risana frá Belfast en þeir eru ríkjandi breskir meistarar í íshokkí.
Cech er núna 41 árs gamall og er almennt talinn einn af bestu markvörðunum í sögu ensku úrvalsdeildarinnar í knattspyrnu. Hann var fjórum sinnum enskur meistari, vann enska bikarinn fimm sinnum og Meistaradeildina einu sinni.
Cech spilaði alls 124 landsleiki fyrir Tékkland og tók þátt á HM (2006) og EM (2008 og 2012).
Tékkneski markvörðurinn setti fótboltaskóna upp á hillu árið 2019. Hann byrjaði þá að spila íshokkí líkt og hann gerði í barnæsku í Tékklandi ásamt því að starfa fyrir Chelsea.