Fólk fékk allt fyrir peningin í Egilshöll þegar Fjölnir og SA mættust í hörkuleik í Toppdeild karla í gærkvöldi. Heimamenn í Fjölni sýndu mikinn karakter, komu til baka eftir að hafa lent undir í öðrum leikhluta og lönduðu að lokum sterkum 4–3 sigri gegn öflugu SA liði.
Myndir frá Hafsteini Snæ Þorsteinssyni
Leikurinn
Fyrsti leikhluti var jafn og markalaus, en hlutirnir fóru að gerast í öðrum hluta. Freyr Waaage kom Fjölni yfir á 26. mínútu, áður en Bjarki Jóhannsson jafnaði fyrir SA. Skömmu síðar kom Bjarmi Kristjánsson gestunum yfir og SA var allt í einu komið með frumkvæðið. Matthías Stefánsson bætti svo við þriðja markinu og SA fóru með 3-1 forskot inn í þriðja leikhluta og virtust ætla að sigla þessu heim.
Dómararnir á fullu að hafa hemil á þessu
Fjölnir hafði annað í huga og mætti ákveðið til leiks í þriðja leikhluta. Mikill hita var í byrjun þriðja leikhluta, sem sendi þrjá menn úr hvoru liði í sturtu og hafði það greinilega meiri áhrif á norðanmenn. Hektor Hrólfsson minnkaði muninn fljótlega eftir þetta og Jere Koikkalainen jafnaði 3–3. Lokamarkið kom svo aðeins mínútu síðar þegar Hektor skoraði sitt annað mark í leiknum og tryggði Fjölni frábæran endurkomusigur. SA menn reyndu hvað þeir gátu undir lokin, tóku markmanninn útaf til að bæta við manni í sóknina en það dugði ekki til.
Tölfræði:
Fjölnir
- Tuomas Heikkonen – 30/33 (90,9%)
- Hektor Hrólfsson 2/0
- Jere Koikkalainen 1/1
- Freyr Waaage 1/1
- Róbert Pálsson 0/1
- Viktor Svavarsson 0/1
Refsímínútur: 81
SA
- Jakob Jóhannesson – 20/24 (83,3%)
- Matthías Stefánsson 1/0
- Bjarmi Kristjánsson 1/0
- Bjarki Jóhannsson 1/0
- Arnar Kristjánsson 0/1
- Robbe Delport 0/1
- Heiðar Jóhannesson 0/1
Refsímínútur: 79
Hektor setti tvö mörk í gær
Virkilega sterkur sigur Fjölnismanna og spurning hvort þeir nái að halda þessum sigrum áfram. Næsti leikur þeirra er gegn SR 6. desember en næsti leikur í Toppdeildinni er næstkomandi laugardag þegar SR fara norður.